فیصل آباد(حمزہ اکرم)چیئرمین ایف ڈی اے چوہدری لطیف نذر نے کہاہے کہ حکومت مہنگائی کے مسئلے پر قابو پانے کیلئے جامع لائحہ عمل تیار کررہی ہے اس سلسلے میں وزیر اعظم پاکستان عمران خان عام آدمی کو معاشی ریلیف فراہم کرنے کیلئے عنقریب مراعاتی پیکیج کا اعلان کرینگے۔ انہوں نے یہ بات اپنے دفتر ایف ڈی اے کمپلیکس میں شہریوں کے مسائل سنتے ہوئے کہی۔ انہوں نے کہاکہ وزیر اعظم عمران خان کو عوام کی معاشی مشکلات کا بے حد احساس ہے اور وہ بے جامہنگائی اور اشیائے ضروریہ کی مصنوعی قلت پید ا کرنے والے مافیا کیخلاف برسرپیکار ہیں۔ انہوں نے کہاکہ وطن عزیز کی سماجی و معاوشی شعبوں میں مضبوط بنیاد فراہم کرنا موجودہ حکومت کا مشن ہے جس کیلئے کرپشن پر قابو پانے اورادارہ جاتی اصلاحات پر عملدرآمد کیلئے ٹھوس حکمت عملی اختیار کی گئی ہے جس کی بدولت مستقبل میں پاکستان ایک مستحکم اور باوقار ملک بن کر ابھرے گا۔ انہوں نے اپوزیشن کے ا حتجاج کو بے وقت کی راگنی قرار دیتے ہوئے کہاکہ ملک کو ترقی کی صحیح سمت کی طرف لانے کیلئے کرپشن سمیت دیگر درپیش رکاوٹوں کو ہٹایاجارہاہے جو سیاسی حریفوں کیلئے تکلیف دہ امرہے اور وہ طرح طرح کی سازشوں میں مصروف ہیں۔چیئر مین ایف ڈی اے نے مختلف محکوں کے بارے میں شہریوں کے مسائل سنے اور انہیں حل کرنے کیلئے متعلقہ افسران سے بات کی۔ انہوں نے کہاکہ ایف ڈی اے کی سروسز کے معیار میں مزید اضافہ کیلئے متعدد اصلاحات پر عمل پیرا ہیں تاکہ شہری ترقی سمیت ہاؤسنگ اور دیگر شعبوں میں عوام کو تیز رفتار ریلیف فراہم کیاجاسکے۔انہوں نے کہاکہ سٹرکوں کی تعمیر و مرمت اور بحالی سمیت دیگر ترقیاتی منصوبے بھی تیزی سے مکمل کررہے ہیں کیونکہ عوام کو بنیادی سہولیات کی فراہمی وزیراعظم عمران خان کی اولین ترجیحات میں شامل ہے جس کیلئے تمام تر انتظامی مشینری کو متحرک رکھاگیاہے۔ انہوں نے شہریوں سے کہاوہ اطمینان رکھیں انہیں کسی صورت نظر انداز نہیں کیا جائیگا۔
