فیصل آباد(ڈسٹرکٹ رپورٹر)ایف ڈی اے کی ڈویلپمنٹ اینڈ فنانس کمیٹی نے ایف ڈی اے اربن ڈویلپمنٹ (یوڈی)ونگ اور واسا کے رواں مالی سال 2023-24کے 10ارب 73کروڑ 30لاکھ روپے مالیت کی بجٹ تجاویز کی منظوری دیدی ہے جس میں چارارب 81کروڑ 90لاکھ روپے کی بجٹ تجاویز ایف ڈی اے جبکہ 5۔ارب 91لاکھ چالیس ہزار روپے کی بجٹ تجاویزواسا سے متعلقہ شامل ہیں اس سلسلے میں ڈویلپمنٹ اینڈ فنانس کمیٹی کا اجلاس ڈائریکٹر جنرل ایف ڈی اے محمد آصف چوہدری کی زیر صدارت ایف ڈی کمپلیکس کے کمیٹی روم میں منعقد ہوا جس میں ایم ڈی واسا خالد رضا خاں، ایڈ یشنل ڈائریکٹر جنرل ایف ڈی اے عابد حسین بھٹی، ڈائریکٹر فنانس محمد شہاب اسلم، ڈائریکٹر فنانس واسا شہریارحسن اوردیگر افسران کے علاوہ محکمہ پلاننگ اینڈ ڈویلپمنٹ پنجاب، محکمہ فنانس پنجاب، ہاؤسنگ،اربن ڈویلپمنٹ اینڈ پبلک ہیلتھ انجینئرنگ پنجاب اور ڈپٹی کمشنر کے نمائندہ افسران ثمینہ نیازی، شہزاد نثار،محمد ناصر،عمران بٹ، اشرف علی نے شرکت کی۔ڈائریکٹر فنانس ایف ڈی اے محمد شہاب اسلم، ڈپٹی ڈائریکٹر فنانس حمیرا شرف اور ڈائریکٹر فنانس واسا شہریار حسن نے ایف ڈی اے اورواسا کے آئندہ مالی سال کے سالانہ بجٹ کی تجاویز کی تفصیلات سے آگاہ کیا۔اجلاس کے دوران تجاویز پہ بحث کرتے ہوئے بعض تجاویز میں معمولی ردوبدل کے ساتھ ان کی منظوری دی گئی۔ ڈائریکٹر جنرل ایف ڈی اے نے اجلاس کے تمام شرکاء کا خیرمقدم کرتے ہوئے کہاکہ ان تجاویز کے تحت ایف ڈی اے یوڈی ونگ کیلئے متوازن بجٹ مرتب کیاگیا جن میں آمدن کے وسائل میں اضافہ کو فوقیت دی گئی ہے تاکہ آمدن و خرچ کے تخمینہ جات میں توازن برقرار رکھا جاسکے اور ترقیاتی اور غیر ترقیاتی اخراجات میں دقت نہ ہو۔انہوں نے کہاکہ ایف ڈی اے سٹی میں دستیاب رہائشی و کمرشل پلاٹس کو نیلام عام کے ذریعے فروخت کرنے کے علاوہ مختلف بزنس ماڈلز تیار کرکے ایف ڈی اے کے مالی وسائل میں اضافہ کرینگے۔ اس موقع پر واسا کے مالی سال 2023-24کے سالانہ بجٹ کی تجاویز کی بھی منظوری دی گئی۔