فیسکو اپنے صارفین اور سمندر پار پاکستانیوں کوجدید سہولیات دینے کیلئے کوشاں

عوامی مسائل

فیصل آباد( حمزہ اکرم ) فیصل آباد الیکٹرک سپلائی کمپنی (فیسکو) اپنے ریجن بھر کے صارفین اور سمندر پار پاکستانیوں کوجدید سہولیات کی فراہمی اور انفراسٹرکچرکی بہتری کیلئے کوشاں ہے اس سلسلے میں ریجنل کسٹمر سروسز سنٹر کو اپ گریڈ کرنے کے ساتھ ساتھ سٹیٹ آف دی آرٹ آلات سے مزین کر دیا گیا ہے یہ باتیں چئیرمین ایچ آر کمیٹی فیسکو بورڈ آف ڈائریکٹرز رانا عاطف نے ریجنل کسٹمرو سروسز سنٹر کے دورہ کے موقع پر کہیں۔انھوں نے کہا کہ فیسکوجدید اور بدلتے دور کی ضروریات کے پیش نظرآئی ٹی کے استعمال سے صارفین اور محکمہ دونوں کیلئے آسانیاں فراہم کر رہا ہے۔ صارفین محکمہ کا قیمتی اثاثہ ہیں اور انھیں ہر ممکن سہولیات بہم پہنچانے کیلئے مزید اقدامات بھی کئے جا رہے ہیں۔ انھوں نے کہا کہ فیسکو کسٹمرسروسز سنٹر ز کسٹمر فرینڈلی بنانے کیلئے تمام ممکن وسائل کو بروئے کار لایا جارہا ہے تا کہ صارفین کی شکایات کا فوری ازالہ ممکن ہو سکے اور کمپنی کا بہترین امیج سامنے آسکے۔ انھوں نے فیسکو افسران کو ہدایت کی وہ کمپلینٹ سنٹرز اور کسٹمر سروسز سنٹر کا اچانک دورہ کریں اور ملازمین کو صارفین کی شکایات کے فوری ازالے کا پابند کریں۔ اس موقع پرچیف ایگزیکٹو فیسکو انجنئیربشیراحمد نے چئیرمین ایچ آر کمیٹی رانا عاطف کو کسٹمرسروسز سنٹرز میں فراہم کی جانیوالی سہولیات کے متعلق آگاہ کیا اورکہا کہ معذوروں، سنئیر شہریوں او ر اوورسیز پاکستانیوں کیلئے کسٹمر سروسز سنٹر میں علیحدہ کاؤنٹر قائم کر دیا گیا ہے جہاں اب بغیر انتظار کے ان کی شکایات کو فوری اٹینڈ کیا جا رہا ہے۔انھوں نے مزید کہا کہ فیسکو نے موبائل ایپ بھی متعارف کرا دی ہے جو اینڈرائیڈ موبائل فون کے ایپ سٹور سے ڈاؤن لوڈ کر کے موبائل میں انسٹال کی جاسکتی ہے۔ صارفین اس موبائل اپلیکیشن کے ذریعے اپنا لوڈمینجمنٹ شیڈول، ڈوپلیکٹ بل، بجلی کے متعلق شکایات اور سابقہ مہینوں کی بلنگ کی معلومات حاصل کر رہے ہیں۔ انھوں نے کہا کہ فیسکو میں نئے کنکشن بجلی کیلئے آن لائن درخواستیں جمع کرانے کا سلسلہ شروع کر دیا گیا ہے جس سے صارفین کو نئے کنکشن کے حصول کیلئے دفاتر کے چکر لگانے سے نجات مل گئی ہے اور وہ گھر بیٹھے اپنی درخواستیں جمع کروا رہے ہیں بعدازں چئیرمین ایچ آر کمیٹی رانا عاطف نے ریجنل کسٹمر سروسز میں جدید ٹوکن مشین اور مختلف کاؤنٹر زکا معائنہ کیا اور اس پر تعینات عملے سے سوالات بھی کئے۔ اس موقع پر جنرل مینجر آپریشن چوہدری محمد سلیم، چیف انجنئیر پی اینڈ ڈی عطرت حسین،ڈائریکٹر کمرشل خالد محمود، سٹاف آفیسر عابدرشید اور دیگرا فسران بھی موجود تھے۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے