مویشی منڈی میں فی جانور فیس 2000 سے کم کرکے 1000 روپے مقرر

ضلعی انتظامیہ نے عوامی شکایات پر فوری ایکشن لیتے ہوئے نیاموآنہ فیصل آباد میں قائم ماڈل کیٹل مارکیٹ میں فی جانور انٹری فیس 2000 روپے سے کم کرکے 1000 روپے مقرر کر دی۔ ڈپٹی کمشنر فیصل آباد کیپٹن(ر) ندیم ناصر نے ماڈل کیٹل مارکیٹ کا دورہ کرتے ہوئے نئی مقرر کردہ فیس کا شیڈول نمایاں طور پر آویزاں کرنے کی ہدایت جاری کی۔ انہوں نے واضح کیا کہ اوور چارجنگ ہرگز برداشت نہیں کی جائے گی، جبکہ اس کی روک تھام کے لیے ریونیو اور سول ڈیفنس کے عملے کی ڈیوٹیاں بھی لگا دی گئیں۔ ڈپٹی کمشنر نے مویشی منڈی میں صفائی ستھرائی کے انتظامات مزید بہتر بنانے کی ہدایت دیتے ہوئے لائیو سٹاک کاؤنٹر پر ادویات اور جانوروں کی چیکنگ کے عمل کا بھی جائزہ لیا۔ انہوں نے تاکید کی کہ لائیو سٹاک ٹیم کی چیکنگ کے بغیر کسی جانور کو منڈی میں داخل نہ ہونے دیا جائے۔ بعدازاں انہوں نے خانوآنہ میں قائم عارضی سیل پوائنٹ کا دورہ بھی کیا اور بیوپاریوں و خریداروں سے ملاقات کرکے انتظامات کا جائزہ لیا۔ اس موقع پر اسسٹنٹ کمشنر سٹی عادل عمر، اسسٹنٹ کمشنر صدر ڈاکٹر ذوالقرنین اور دیگر افسران بھی موجود تھے۔